Pas rastit të parë pozitiv me koronavirus në Vatikan, Selia e Shenjtë po merr në vlerësim vendimin për transmetimin me video të Lutjes së Angelus të Papa Franceskut, ditën e diel 8 mars 2020, për shkak të numrit të madh të besimtarëve që popullojnë sheshin Shën Peitro.

Po ashtu po vlerësohet diçka e tillë dhe për meshën e përgjithshme të ditës së mërkurë, që Papa Francesku mban tradicionalisht në sheshin Shën Pietro.

Kisha Katolike e Selia e Shenjtë prej datës 26 shkurt kanë hyrë në kalendarin fetar të javëve përgatitore e që paraprijnë Festën e Pashkëve që sivjet do të jetë më 12 prill.

Lajmi për pacientin e parë me koronavirus në Vatikan është bërë i ditur nga drejtori i zyrës së shtypit të Selisë së Shenjtë Matteo Bruni gjatë një takimi me gazetarët.

“Sot në mëngjes Drejtoria e Higjienës Sanitare ka mbyllur dhe është pezulluar puna në ambulatorët mjekësorë në Vatikan, e ka nisur procesi i disinfektimit e i higjienizimit, pas verifikimit të pacientit të parë pozitiv pozitiv me koronavirus në Selinë e Shenjtë.”

Edhe Vatikani ka adoptuar masat drastike të parandalimit të përhapjes së këtij virusi duke pezulluar të gjitha mbledhjet, eventet sociale e aktivitetet formuese.

Në ambientet e mbyllura lejohet një numër i limituar personash për të respektuar distancën të paktën 1 metër nga njëri-tjetri.

Selia e Shenjtë rekomandon gjithashtu banorët e saj të evitojnë sa mundin udhëtimet e në rast simptomash gripi të mos paraqiten në repartin e Shërbimit të Rojës Mjekësore në qendrat ambulatore, por të kërkojnë një vizitë mjekësore në shtëpi.